Народ наш – Хрыстос, варты веры і цуду, пасланы на крыж, ад пакут анямеў. Ты ж славіў Яго і прадаў, як Іуда, і трыццаць срэбранікаў займеў. Ня будзеш мець шчасьця з такога жыцьця, з чужацкіх заслугаў і танных мэдаляў. Няўжо табе, хлопча вучоны, няўцям, што брацьцяў прадаў, як Хрыста прадавалі? Тут насьмерць, тут мурам стаяць сьмельчакі, прыстыджаны вораг ад іх адыходзіць. А ты ад чужынца прыняў медзякі, пакінуўшы ганьбу на нашым народзе. Іхняя справа – глуміць нас і біць і забіраць у народа сьвятое. Народу ж належыць узьняцца і жыць, і ён вас, як варту, паставіў на тое. I што ж вы данесьлі, няшчасны, на нас – на нашу сямейку, што выжыла з мукаў? На сына, што падаў, падцяты, ня раз? Ці пад удар падставілі ўнукаў? Ці за гасьціннасьць, за хлеб і за соль, што мы падзялялі зь людзьмі без карысьці, вы прадавалі народны наш боль і неспакойныя, вольныя мысьлі? Прывычныя мы кожны дзень працаваць, цярпець за свабоду Айчыны каханай. Дык што ж вы хацелі урэшце прадаць – любоў да народа ці нашыя раны? Такога, як вы, сярод нас не сустрэць, бо мы гартаваныя ў горы, цярпеньні. Калі хто з нас падаў, дык падаў насьмерць, але ніколі – рабом – на калені! Лясы ў нас ня з лозаў і не з бадылёў, і не адныя блукаюць там зайцы. Айчынныя пушчы – з адвечных дубоў, таксама зубрамі яны ганарацца! Народ не заплача, ня плачуць па тых, хто так спадцішка да чужых адыходзіць. Вылеціць болей арлоў маладых, і болей дастойных жанчыны народзяць! Роўныя ненавісьць ў нас і любоў, а ў небясьпецы – ня страх, а адвага. Калі ў нашых жылах яцьвяжская кроў, то скажам вялікае дзякуй яцьвягам! На поўначы лютай мы мерзьлі наскрозь, Бог дасьць, нашым людзям так не давядзецца. Марозілі старасьць нам і маладосьць, хацелі яшчэ замарозіць нам сэрцы. Не, так далёка мароз не пранік, не замарозіў душы і сумленьня. Мы крыкнем – і праўнукі ўчуюць наш крык, патоптаных злыднямі ўзьнімуць з каленяў! Ня тое рабіў з намі люты маскаль, мардуючы лепшых ў нявольнай Айчыне. Нам сёньня зламаных, застрашаных жаль, як маці шкадуе аблуднага сына. Нас мучылі, гналі, але не змаглі. Зноў недруг над намі, над вамі лютуе. Прыпадзьце абліччам да роднай зямлі – магчыма, зямля, зразумеўшы, даруе...
|
|