Можа, голас пачуеш мой, Ведай – Сьмеласьці не было, І дамовіўся я зь зімой, Каб напомніла пра цяпло. Рыпне прыцемак незнарок, Ведай – Гэта ня я іду, Ды ня мог утрымаць свой крок, Што прывык давярацца ільду. Загалосіць твой тэлефон, Ведай – Гэта ня я званю, Вецер з тых незабытых дзён Хоча выслухаць цішыню... Я вучыўся табой гаварыць, Я вучыўся маўчаць табой. Неба смутку майго гарыць, Ліўням не затушыць той боль. Перуны ня сьпяць, Ды вясны Без асеньняй цябе няма. Да мяне пасылаеш сны. Хоць аднойчы прыйдзі сама!
|
|