Пішыце дзёньнікі, паэты! Зь бясстрашнай фігай у кішэні, Кляйміце ганьбай прайдзісьветаў, Што так нахабна расшышэлі! Пішыце, мілыя! І ў скрынку, У стол хавайце іх, каб потым Чытач-нашчадак горда ўскрыкнуў: «Вось быў змагар! Вось быў апостал! Як не цярпеў ён служкаў здрады, Што край прадаць былі гатовы! Якія гнеўныя тырады Абрынуў ён на іх галовы!..» Пішыце! I, каб не спазьніцца I не ўпусьціць бяздарна шанцу, Хутчэй бяжыце пакланіцца I ў ручку цмокнуць запраданцу. Пасьля кульніце дома чарку, I нават дзьве – як пад закуску. I гэта будзе – ад пачатку I да канца – па-беларуску.
1997-1998
|
|