Годзе, скептык, д’яблу ў лад Цьвердзіць марна, Што вярнуца ў весьні сад Не рэальна. А калі ў прыродзе ёсьць Цудадзейны Міг вяртаньня ў маладосьць Неспадзеўны? Сьветлы міг, каб уталіць, Нібы смагу, Боль, што ўсё яшчэ баліць – Сьціха, змалу. Той, зь якім і адыду, Той, якому Рысу я не падвяду Аж да скону. Як і кожны ў Бога госьць, Рад табе я, Міг вяртаньня ў маладосьць, Міг-надзея! Адлюбіў, недалюбіў – Век ня вечны. Цудам, міг, цябе зрабіў Боль сустрэчны.
2001-2002
|
|