Сэрбскаму сябру і пабраціму паэту Мамчылу Джэркавічу
|
Я з табой! Пачуй мяне, Мамчыла! Я з табой, з табой, мой любы брат! Што было і ў думках немагчыма – Стала явай пяць хвілін назад. Памутнеўшы розумам ад шалу, Рынулася зборня чорных зграй Руйнаваць суздром тваю дзяржаву, Паліваць агнём твой родны край. Што ім трэба там – што скопам цэлым Наляцелі? Хто іх клікаў-зваў? Трэба ім, каб ты пад іх прыцэлам На калені паслухмяна стаў. Ты – хто ў грозным, страшным сорак трэйцім, У няспоўненых трынаццаць год, Са сьвятой пагардаю да сьмерці, Стрэльбу ўзяў – зьнішчаць фашысцкі зброд. Ты – хто, сэрбскай гартаваны воляй, Той вясной, ля Сітніцы-ракі, З поля бою, з косаўскага поля, Сьцёкшы кроўю, выйшаў без рукі... Памыліліся вытворцы сродкаў Непакорлівым ламаць хрыбты: На зямлі, што ўся ў магілах продкаў, Перад хіжымі ня ўкленчыш ты! І калі яны ня ўцягнуць іклы Зноў у пашчу – што ж, грымецьме бой, Ты, стары салдат, прымаеш выклік. Я – таксама, брат мой. Я з табой!
25.III.1999.
|
|