Заўжды прыпамінаю вечар той: За вокнамі – мяцеліца і сьнег, А ў хаце – цішыня, і мы з табой. Арэхамі частуеш ты мяне. Частуеш і сьмяесься: – Адгадай: Што – цот ці лішка – у руках маіх? – О, пачакай, – кажу, – падумаць дай, Дай заглянуць у тонь вачэй тваіх... Як сьвет, старая даўняя гульня, Ну што ж, мне і прайграць табе ня страх, Бо не арэхі, мілая мая, А сэрца, знаю, у тваіх руках. Ня бойся, паглядзі, раскрый далонь! Што ж змоўкла ты? Спужалася сама?.. Як добра, што ўсё гэта быў ня сон, – Са мною ты, і вецер, і зіма!
1952
|
|