РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Вясна
Ой, вясна, ой, вясна!
За душу ты мілей, –
З табой доля ясна,
З табой жыць весялей!
 
Як зьявілася ты,
Лес іначай шуміць,
Узлажыўшы лісты,
Як пан, думны стаіць.
 
Ты зялёнай травой
Скрыла чорну зямлю
І прызвала сабой
Усіх к працы, к жыцьцю.
 
Гоман птушак-пяюх
Льецца ў вушы твае,
На жалейцы пастух
Галасіста пяе.
 
Чуць заняўся усход
Неба яснай зарой,
Прэ на поле народ
З бараной і сахой;
 
Працавітай рукой
Засявае шнурок...
Ой, радзі, Божа мой,
На пацеху хлябок!
 
А далей паглядзі, –
Там дзяўчаткі стаяць,
І зь дзявочай грудзі
Песьні громка ляцяць.
 
Адным словам, кругом,
Вясна, права тваё!
Зь цябе долю бяром
І салодзім жыцьцё.
 
Засьвяці ж ты, вясна,
Сваім бляскам для нас,
Калі сэрца, душа –
Сьпяць у чорненькі час!
 
Засьвяці, калі мы
Абліёмся сьлязьмі,
Разбудзі нашы сны!
Душу, сэрца вазьмі!
 
[1905–1907]
 
 
 
 
Падабаецца     Не падабаецца
2009–2019. Беларусь, Менск.