Прывітанне, – прамовілі вусны, – Сустракай, я дадому вярнуўся! І цяпер у адным накірунку Нам ісці між драўляных завулкаў. Прывітанне, лясамі сагрэтая. Ты адзіная, добрая, светлая. Я усмешку пашлю прамяністую, Яна блісне ў вачах тваіх чыстых. Прывітанне – зімоваю раніцай Ціхім стукам ў акно прачынаешся, Белым снегам на шыбу сядаеш, Цёплай коўдрай зямлю накрываеш, Навучаеш цярпенню даросламу, І у словах смяешся апострафам, Мяккім знакам пяеш калыханку, Закрываеш далонямі хмарку. “Прывітанне”, – скажу я няўдала, І дзяцінства сваё прыгадаю: Рукі матчыны, спеў салаўіны, Пацалунак каханай дзяўчыны, Наказ бацькі, палі і азёры – Ты даруеш свабоду прасторы! Ты адкрытымі дзверы трымаеш, На парозе дзяцей сустракаеш. Прывітанне, – прысяду на лаве, Падасі ты мне кубачак кавы, І спытаеш: Ну, як там жывецца За марамі? Не шчыміць ці сэрца? Адкажу я: мая ты матуля, Мне ў адной тваёй хаце утульна. Ты мяне дабрыні навучыла, Быць адданым, руплівым, шчаслівым. І таму я жыццё прысвячаю Свайму любаму роднаму краю. І, як птушка, над ім я ўзнімуся: Жыць мне вечна ў маёй Беларусі!
2008
|
|