|
Habrusia ŭ žaŭnierku ŭziałi...
|
|
Pieśnia na vajacki ład
|
Habrusia ŭ žaŭnierku ŭziałi,
Ad damoŭstva adarvałi.
Zažuryŭsia stary tatka,
Stohnie, płača ciažka matka,
Oj, Habruśka! Oj, Habruśka!
Nie žurbujcie, tata, maci!
Ja ŭsiadzieć nia moh u chacie,
Sam pajšoŭ pa dobraj vołi,
Paspytać vajennaj dołi,
Nie žurbujcie, nie žurbujcie!
Svajaki ŭsie i susiedzi –
Nichto doma ź ich nia ŭsiedzieŭ,
Vyjšłi ŭsie z adneju radaj –
Baranicca ad napadu,
Baranicca, baranicca!
Mučyć vorah nas zaŭziaty:
Papałiŭ nam našy chaty,
Pataptaŭ nam naša pole,
Pakaraŭ ludcoŭ niavolaj...
Mučyć vorah, mučyć vorah!
I my ŭ šapku spać nia budziem,
I pakažam śvietu, ludziam,
Jak baronim miežy rodny
Ac napaści ad niahodnaj.
Jak baronim, jak baronim!
Nie žurbujcie ž, tata, maci!
Budu vas jašče vitaci,
Jak z vajny zdaroŭ viarnusia
I vam nizka pakłaniusia...
Nie žurbujcie, nie žurbujcie!
A jak zhinu, to ziaziula
Prylacić da vas adtula
I la voknaŭ, la chaciny
Zakukuje, što ja zhinuŭ.
Zakukuje, zakukuje!
1919
|
|
