Časam prysłuchajusia niaśmieła:
Mnie zdajecca, znoŭku čuju śpieŭ
Rodnych rek, paloŭ, viatroŭ i dreŭ –
Adhałoski Šyrmavaj kapeły.
Kab jaje pasłuchać, zamirała
Ŭsio žyvoje ad ziamłi da zor,
Narač bušavać pierastavała,
Boh ścišaŭ svaich aniołaŭ chor.
Voś iznoŭku śpieŭ kapeły čuju.
Znać, niapraŭda, što tvarec jaje
Adyšoŭ. I siońnia jon žyvie,
Kałi pieśnia ščyraja chvaluje.
1979
|
|
