RODNYJA VOBRAZY Vobrazy miłyja rodnaha kraju,               
Smutak i radaść maja!..
      
 
Jakub Kołas
    Hałoŭnaja      Słoŭniki           Spasyłki      Ab sajcie       Кірыліца      Łacinka    
Janka Kupała
Vieršy
Kantekstny tłumačalny słoŭnik
Carskija dary
Ź minułaha
Car hrozny, maskoŭski – viasioły,
Ščaśłivy z pabiedaŭ viałikich –
U hości i ź miestaŭ, i ź siołaŭ
Niavolnikaŭ viernych pakłikaŭ.
 
Pad vodhulle trubaŭ, łitaŭraŭ,
Pad rohaty ŭpaśvienaj dvorni
Padnosić paddanym jon dary, –
Niavolniki prymuć pakornie:
 
Daru ja tabie, ukraincu,
Ukrajny kapalni i stepy, –
Za heta vuhol i pšanicu
Ty zvoziš mnie ŭ śvirny i sklepy.
 
U Polščy ty, polski narodzie,
Žyvi sabie j dumaj ab słavie, –
Mnie tolki chaj tkuć tkačy ŭ Łodzi;
Čuŭ – pieknyja polki ŭ Varšavie.
 
Chaj Łatviju voźmuć łatvijcy
I rybnuju ŭ Bałtycy łoŭlu, –
Adno ja da ichniaj ziamłicy
Baronaŭ dadam na hadoŭlu.
 
Ty ciešsia, hruzinie, krainaj,
Tamaraj hruzinkaju słaŭnaj, –
Mnie vydziełiš tolki čaścinu,
Dzie pychkajuć naftaj fantany.
 
Svoj Krym, a ź im chanaŭ i mułaŭ
Biary sabie, krymski tataryn, –
Mnie ž mora pakinieš ahułam
I ŭsie sanatoryi daram.
 
Ty, moj turkiestanski sabratu,
Idzi ŭ Turkiestan razžyvacca, –
Ŭzamien ja karakul i vatu
3 tvaich paźbiraju płantacyj.
 
Tabie, sibirak, biez hranicaŭ
Sibir addaju, mo što vyśpiš, –
Ale mnie da ŭłasnaj skarbnicy
Sibirskaje zołata ssypieš.
 
A ty, biełarusie niamruščy,
Vaźmi Biełaruś na ŭspaminak, –
Tvaje ž prydaducca mnie puščy
Moj carski viałičyć budynak.
 
I prava daju dla ŭsich razam
Pładzicca, jak maku ziarniaty, –
Za što mnie za pieršym nakazam
Daścio ŭsie synoŭ u sałdaty.
 
Tak hrozny maskoŭski car ščyra
Działiŭ miž niavolnikaŭ dary,
Pad hiki prydvornych upyraŭ,
Pad vodhulle trubaŭ, łitaŭraŭ.
 
1926
 
 
 
 
Padabajecca     Nie padabajecca
2009–2019. Biełaruś, Miensk.