#1
Budź hatoŭ!
Budź hatoŭ ty, vajaka mały,
Ci to rana, ci pozna!
Lotna tak, jak arły-sakały,
Nie čakajučy słoŭ
Ad prynuki pahroznaj,
Budź hatoŭ!
Kolki sił – ściah dziaržy ŭ kułačku!
Bo jak zdarycca sprava, –
Nie dramać, vierna być načaku!
Na ŭbaronu baćkoŭ
Pijanerskaju słavaj
Budź hatoŭ!
Nie drami, revalucyi syn,
U źvianie, u atradzie!
Ŭ bubien bi, pieśni piej, kłič na čyn!
A siastryc i bratkoŭ
Nia dać kryŭdzie i zdradzie
Budź hatoŭ!
Niezdarma, moj mały pijaner,
Ty – čyrvonaja źmiena;
Dumki, siłu hartuj na manier
Svaich staršych – baćkoŭ;
Stać za volu niaźmienna
Budź hatoŭ!
Biełaruś spadziajecca ź ciabie
Mieć svajho abaroncu,
Budź ža im, i ŭ žyćcia baraćbie,
Ŭžo darosšy hadkoŭ,
Jaje vieści da sonca –
Budź hatoŭ!
#2
Zaŭsiody hatoŭ!..
Pijaner ja małady, choć kudy!
Nie smučusia, śmiajusia, viasioły;
Ja nia znaju ni biady, ni nudy,
Buchnu ŭ bubien – i pajšoŭ, i pajšoŭ..
Pieraskočyć i hory, i doły
Zaŭsiody hatoŭ!
Za svabodu ja pajdu choć u vir,
Bo ja volny, jak viecier, jak ptuška, –
Dziadźka Lenin mnie adno – pravadyr
Za pracoŭny narod proć akoŭ
Vyjści ź pieśniaj svajoj viesiałuškaj
Zaŭsiody hatoŭ!
Nie bajałisia brać barykad,
Jak niavołi išłi kryšyć ścieny...
Ja taksama razburać stary ład,
Dzie zastaŭsia ad minułych viakoŭ,
Sastareŭšym vajakam na źmienu
Zaŭsiody hatoŭ!
Choć babułi mnie burčać, nie maŭčać,
Što z bahami nijak nie mirusia...
Čym papała ja hacić budu hać;
Ja nia tolki vajavać proć bahoŭ, –
Navat čorta haniać ź Biełarusi
Zaŭsiody hatoŭ!
Padraści b mnie, jak maha najbardziej, –
Pakazaŭ by svaju moc i siłu!
Ścieražysia ŭžo tady, łichadziej!
Baranić ŭ kožny čas biez admoŭ,
Jak byŭ, budu krasu vołi miłaj
Zaŭsiody hatoŭ!
Voś jaki ja pijaner, choć kudy!
Nie smučusia, śmiajusia, viasioły;
Ja nia znaju ni biady, ni nudy,
Buchnu ŭ bubien – i pajšoŭ, i pajšoŭ...
Pieraskočyć i hory, i doły
Zaŭsiody hatoŭ!
1926
|
|
