Гутарка аб кепскай гаспадыні
|
3 кепскай гаспадыняй Кепска жыць, вядома, – Ані зь ёю ў людзі, Ані зь ёю дома. Не жыцьцё, а мука, Хоць скачы ты жабай, Калі ды ня ўдасца Табе твая баба. Чалавек спакойны Я па сваім складу, Але ж не стрываеш, Як няма дзе ладу. Нават пабажуся, Што ў ніякім чыне Не крану і пальцам Добрай гаспадыні. Але ўжо аб кепскай Аніяк ня змоўчу, Хоць мо і дастану – Ў вочы ці за вочы. Вось яна у хаце, Гаспадыня наша, Выглядам, хадзьбою Нават пеўня страша. Як зірнуць, здаецца, Не брыдкая з твару, – I той стан, як трэба, I ў грудзях шмат жару. Але як там далей Так і гэтак глянеш, – Нікне ўся павабнасьць, Любіць перастанеш. Вось пачнем мы зьнізу, Па сваёй прастоце, – Ногі за калена У гразі, ў балоце. А калі абута, Каб ня секлі блохі, 3 лытак без падвязак Зьехалі панчохі. Перад у спадніцы Ўвесь зафлюндран з долу, Цыцалямі ззаду Цягнуцца брынзолы. Чуць ліпіць на целе 3 вузлоў паясьніца, Ажно кожнай хвілі Валіцца спадніца. А кафтан надзене – Плямы ад заціркі, Дзіркі ў кожным локці I на грудзях дзіркі. Гэтак і кашулю Бачыш ты адкрыта, I яна ўся ў дзірках Ды дзён сто ня мыта. Валасы страхою, Ў валасах, як маку... Век, знаць, не часаны, Косаў ані знаку. Глянь цяпер у хату Гэтай гаспадыні, Хто жыве – ня ўцяміш – Ці людзі, ці сьвіньні. Па кутках і столі Павуціньня густа, Гразі на падлозе – Ў паўаршына луста. Зьбіта, як стог сена, Ў качарэжнік сьмецьце, – Вон не выкідана, Мабыць, з тагалецьця. Пад нагамі венік, Чапяла ў запеччы, За парогам вілкі, А ўсё недарэчы. Кіснуць не памыты Ў лыжачніку лыжкі, Дзе папала – ў нелад Саганы і міскі. На стале абрус той, Як у бот ануча, Не пасьцель на ложку, А так – рызаў куча. А пад ложкам важна Хлеў цялё зрабіла, Парасяты тут жа, – Проста глянуць міла. Пад сталом скавыча, Як бы чаго плакаў, 3 апараным бокам Галодны сабака. 3ь перабітым задам Кот начыньне ліжа, Побач зь ім і певень Хлеб у дзюбу ніжа. Дзеці пустапасам Лазяць сабе самі, Па вушы ў балоце, 3 голымі пупамі. Пад паўдня устала Гэта гаспадыня, Працірае вочы, А сон і ня гіне. Засланку адклала, Пашчапала смолку, Дроваў за чалесьнік Кінула бяз толку. Неяк падпаліла Ў печы гэтак дровы, Аж паплыў на хату Пах смалы яловай. Гаршкі паўстаўляла I так варыць, варыць; Каб хаця ўдалося, – Ціха, сонна марыць. Але, як заўсёды, Не судзіла доля: Як чэмер – капуста, Зацірка – бяз солі. Прыцягнула дзежку 3 рошчынай на лаву, – Ўкісла ці ня ўкісла – Не яе тут справа. Рук не закасаўшы, Нават не памыўшы, Месіць цеста, месіць, А пот лье, як з мышы. Потым гэта цеста 3ь вялікай бядою Пасадзіла ў печку – Сядзі на здароўе! У каго закалец Усяго на палец, Па яе ж законе – На ўсе дзьве далоні. А пайшла карову Падаіць да хлева, Вымя не памыла, Доіць права-лева. Цягне цыцку, цягне, Малако цурыцца – Болей за даёнку Або на спадніцу. Потым сабе села 3 прасьніцай на зэдлі, – Што пацягне нітку – Рвецца ад кудзелі. Так і гэтак тыцне Ды кляне уголас, Нітка ж то як палец, То цяней за волас. Спрала, насукала Пачынак за тыдзень, Дый той змарнаваўся: Зблытаў, мабыць, злыдзень. Але ж нейк за зімку Са сьцяну напрала – Кужаль ды на зрэб'е Перамеркавала. Удалося з часам I паставіць кросны; 3ь пядзю за дзень вытча, А болей дык млосна. Выткаўшы, бяліла, Але так – на сьціркі, Пашто бяліць надта, I так будуць дзіркі. Ну, а пойдзе ў грады, – Поліць, як з пахмельля: Вырве бурак, моркву, А пакіне зельле. У жніво таксама Ўсё йдзе не па мысьлі, Як бы падстаўляе Хто нагу сумысьле. Чуць сярпом ківае, Праклінае гоні, Вышай за калена Вырасла іржоньне. А сноп калі зьвяжа – Як пабэрсаў нехта: Ніяк не згадаеш, Дзе камель, дзе верх той. Гэтак яна ў працы, Гэтак яна ў хаце, 3ь языком затое Не раўня нам, браце. Ой, на гэту справу Не гультай, ня зломак, I прыйсьці да слова Век ня дасьць нікому. А як створыць плёткі, – Ўсіх пасварыць зводна: 3 роднай жонкай – мужа, Брата – зь сястрой роднай. ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ Гэткіх гаспадыняў Няма ў Беларусі, Дык даруйце, цёткі, Што крыху пахлусіў.
1926
|
|