Прывет вам, вольныя паэты,
Прывет вам ад душы ўсяе!
Хай вашы песьні зь лета ў лета
Зямля савецкая пяе!
Жывём у сонечнай краіне
I будзем жыць у добры час,
Дзе праўда ясная ня гіне,
Дзе праўдзе служыць кожны з нас.
*
Прывет вам, вольныя паэты!
Мінуўся подлы гнёт і зьдзек, –
Мы зь цемры выйшлі да прасьвету,
Мы рабства скінулі навек.
Ніхто нам песень не спаганіць,
Свабодных песень, як віхор,
Ні чорных здрайцаў завываньне,
Ні рабаўласьнікаў тапор.
*
Прывет вам, вольныя паэты,
Квяцістай волі песьняры,
Вам, з блізкіх і далёкіх сьветаў
Людскіх душ слаўныя майстры!
Нам расьцярэблены дарогі
Да небывалых новых дзён,
Нам сэрцы б'юцца без трывогі,
Спакойны нашы ява, сон...
*
Прывет вам, вольныя паэты,
Хай час вам радасна бяжыць!
Нам пад шчасьліваю каметай
Так лёгка жыць, тварыць і жыць!
Тут гаспадарку мудры Сталін
Вядзе на дзіва ўсіх вякоў,
Тут людзі плакаць перасталі,
Ў заможных выйшлі з жабракоў.
*
Прывет вам, вольныя паэты,
Народаў братніх дружны хор!
Хай прамянее агняцьветам
Радзімы нашае прастор!
Зайграюць сурмы нам да бойкі,
Пажарам задымяць шляхі, –
Алоўкі зьменім на вінтоўкі,
Заменім пёры на штыхі.
*
Прывет вам, вольныя паэты!
Вітае вас і мал, і стар.
Нясіце ж ленінскім заветам
Свой шчыры песень вашых дар!
Каб празь вякі вясной расьпетай
Дум вашых сказы ў сьвет ішлі...
Прывет вам, вольныя паэты,
На беларускае зямлі!
1936
|
|
