Аэранаўтыкі законы

Найпростыя:  

                       бяры

                       і клей...

I ўзьвіўся над крутым адхонам

Размаляваны пад дракона

Паветраны

Лятучы

Зьмей!

Неспадзяваны

Шлях крылаты,

Зямны

            непрадказальны шлях:

Да вышыні, струной напятай,

Уніз

        па ямах,

                       камянях,

Дзядоўніку набіўшы ў пяты...

I захапленьня крык! I страх!

О не ўпадзі, мой лёс,

                                    узьняты

Драконам аб шасьці хвастах!

У вёскі ўсёй навідавоку

Лунае ён, вогненнабокі,

Рве суравую нітку з рук.

Рубцом

              смыліць далонь пякуча, –

Вышэй,

Вышэй,  

              мой зьмей лятучы,

За кругам круг,

За кругам круг!

...Супроць нябёс – зямля сырая,

І лёс – кругамі праз агонь.

Трываю. Вышыню трымаю,

Балюча нітка суравая

Ўрасла ў далонь.