Нарадзілася 17 снежня 1990 года ў Гомелі. Навучалася ў СШ №19 з мастацкім ухілам. Менавіта з гэтага часу пачалася прага да жывапісу. У 2008 годзе скончыла абласны ліцэй і музычную школу па класе гітары, падалася ва ўніверсітэт. Зараз студэнтка 3 курса філалагічнага факультэта ГДУ імя Скарыны, наведвае школу-студыю “Малады літаратар” пад кіраўніцтвам Н. Шкляравай.  

Захапляецца сюррэалізмам, постмадэрнізмам, беларускай і ўкраінскай музыкай, батыкам і інш. цікавымі рэчамі. Друкавалася ў “Маладосці”, “Літаратурнай Гомельшчыне”, газетах “Раніца”, “Экалагічны веснік”, “Гомельскі універсітэт”,”ЛіМ”, міжнародным альманаху “Сланечнік”. Разам з Максімам Новікам выдае інфармацыйна-культурніцкі лісток “Толькі разам”.

Пачала пісаць яшчэ ў школе. Любоў да мовы з дзяцінства ад бабулі, настаўніцы беларускай літаратуры. Удзячная лёсу, што на яе шляху сустрэліся такія пісьменнікі як Ніна Шклярава, Віктар Ярац, Андрэй Федарэнка, Сяргей Балахонаў, Андрэй Мельнікаў.