Галерэя “Ў” чарговы раз арганізавала цудоўнае каляднае свята для дзяцей пад назвай “Каралеўства маленькіх цмокаў”. Мерапрыемства праводзілася 24-25 снежня з 12 да 19 гадзін у самой галерэі, якая на пэўны час ператварылася ў сапраўдны казачны замак для маленькіх прынцаў і прынцэс, што весела бегалі ў папяровых каронах-самадзелках па чатырох залах сваіх уладанняў.
Падчас майстар-класаў.
Расказвае арт-дырэктар праекта Ганна Чысцякова:
– Ранішнікі ў школах і дзіцячых садках звычайна створаны такім чынам, што большасць дзяцей успрымае іх як нейкі абавязак. Наша мэта заключалася ў тым, каб стварыць казачныя абставіны, якія не былі б падобныя да клішэ ранішнікаў, а наадварот, давалі б дзеткам творчую свабоду. І вось ужо другі год дзеткі з задавальненнем прыходзяць да нас, весяляцца, слухаюць казкі, майструюць цацкі сваімі рукамі. І выглядаюць сапраўды зацікаўленымі, што вельмі прыемна і нам, і іх бацькам.
Можна з упэўненасцю сказаць – творчая свабода была дасягнута, і дзяцей на кожным кроку чакалі цуды. У першай жа залі іх сустракалі незвычайныя выкладчыкі са сваімі майстар-класамі. Ірына Калеснікава вучыла вырабляць сваімі рукмі ваўняныя сувеніры, Вікторыя Вядзерка - араматычныя цацкі, Ганна Барэйка - паштоўкі, Ірына Лукашэнка - гліняныя магніцікі, Вольга Бабурына - драўляныя падвескі з выцінанкай, Вера Прохарава - вінтажныя зоркі. Павел Лукашэвіч паказваў, наколькі прыгожа можна зрабіць роспіс вінілавых цацак і зарыхтовак, Марыя Карпянкова - роспіс драўляных фігурак, Маргарыта Лазарэвіч і Аляксандра Лучкіна адкрывалі таямніцы шкарпэтак для цудаў. Для тых, каго асабліва зацікавіў гэты працэс, галерэя плануе арганізаваць цэлую школу, якая сустракала б сваіх вучняў кожную нядзелю і дапамагала б рэалізоўваць творчы патэнцыял. Таму, разглядаючы цудоўныя самаробныя ўпрыгожванні, кожны можа ўявіць сабе, што ў бліжэйшы час здольны зрабіць не горшыя.
На самым відным месцы першай залы стаяла незвычайная елка: замест цацак на ёй былі дзіркі, каб дзеці маглі “упрыгожыць” яе сваімі ружовымі тварыкамі. Часам яны стваралі цэлыя піраміды, каб заняць месца самай верхняй цацкі.
У кнігарні “логвінаЎ” праводзілася прэзентацыя кнігі “Майстра Рукша” Юрыя Усціновіча, якая была напісана паводле беларускай міфалогіі і распавядала аб слынным майстры і яго самаробнага коніка Грыўке. Людміла Рублеўская, Аляксандр Памідораў, Анка Упала, Вера Жыбуль, Севярын Квяткоўскі і Алена Бабак распавядалі калядныя казкі, якія дзеткі слухалі з увагай і захапленнем, у перапынках разглядаючы рознакаляровыя кнігі.
У гэтыя святочныя дні да дзетак завітаў і тэатр “Кардонка” Святланы Бень і Антаніны Слабодчыкавай з невялікім спектаклем "Быў бы ў мяне цмок", які вызваў такі ажыятаж, што маленькая зала нават не адразу змагла прыняць усіх зацікаўленых гледачоў. Не меншым поспехам карысталася музычная праграма ад гурта Pan-Quartet і калядныя спевы ад Яны i Марты Шчарбаковых.
Увесь гэты час працавала кафэ пры галерэі, дзе дзеці маглі адпачыць ад гульняў і выпіць чаю, зробленага пяшчотнымі рукамі арганізатараў мерапрыемства. А вось для таго, каб адпачнулі душою бацькі, не прыпыняла сваёй працы выстава карцін маладых беларускіх мастакоў. Тут можна было даведацца аб кожнай выстаўленай працы або проста насалодзіцца цішынёй залы.
“Каралеўства маленькіх цмокаў”, несумненна, спадабалася дзецям і дарослым, пакінула толькі добрыя калядныя ўспаміны. Тым, хто не трапіў на гэтае свята, прапаную і рэкамендую наведаць яго ў наступным годзе, калі Новы Год з Калядкамі зноў пастукаюць у дзверы галерэі.
Алена Босава
