РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі      Гасьцёўня      Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Ці ты ўзойдзеш калі, сонца?
З плачам думка-песьня льецца
Па замучанай старонцы,
З плачам рэха адаб’ецца...
      Ці ты ўзойдзеш калі, сонца?
 
Маці-ўдоўка, сірацінка
Паглядаюць у аконца, –
Дагарэла ўжо лучынка...
      Ці ты ўзойдзеш калі, сонца?
 
Пхнецца сьцежкай падарожны, -
Няма хлеба ўжо ў катомцы, –
Цэль далёка, зблудзіць можна..
      Ці ты ўзойдзеш калі, сонца?
 
Мужык з горам ляжа, ўстане,
Пляце байкі дзеткам, жонцы,
Толькі чутны уздыханьні...
      Ці ты ўзойдзеш калі, сонца?
 
Шнур бядак пахаў да поту, –
Марны ж колас на саломцы, –
Ні красы той, ні ўмалоту...
      Ці ты ўзойдзеш калі, сонца?
 
Безьзямельны згубіў долю,
Хоць шукай зь бяды ў палонцы;
Ні той хаты, ані поля...
      Ці ты ўзойдзеш калі, сонца?
 
Путы, катаргі, астрогі,
Сібір поўная бясконца;
Ні той праўды, ні дарогі...
      Ці ты ўзойдзеш калі, сонца?
 
З плачам думка-песьня льецца
Па замучанай старонцы,
З плачам рэха адаб’ецца...
      Ці ты ўзойдзеш калі, сонца?
      – Ці ты ўзойдзеш?
 
[1906–1909]
 
 
 
 
Падабаецца     Не падабаецца Водгукі
2009–2019. Беларусь, Менск.