РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Б’юць на трывогу званы...
Б’юць на трывогу званы,
Клічуць да новай вясны,
К новаму Богу завуць,
Б’юць на трывогу званы,
      Б’юць, б’юць!..
 
Час ужо браць тапары,
Косы кляпаць да зары,
Покі ў грудзях жар ня згас,
Час ужо браць тапары,
      Час, час!..
 
Рэж на дарозе дзярно,
Што ногі раніць даўно,
Углыб запускай свой лямеш,
Рэж на дарозе дзярно,
      Рэж, рэж!..
 
Крыж прад вачамі стаіць,
Крыж абвіла помсты ніць,
Процьма удоўжкі і ўзвыш,
Крыж прад вачамі стаіць,
      Крыж, крыж!..
 
Рвуць твае жылы кругом,
Родны раскідалі дом,
Гібель табе скрозь равуць,
Рвуць твае жылы кругом,
      Рвуць, рвуць!..
 
А на трывогу званы
Б’юць на парозе вясны,
К новаму Богу завуць,
Б’юць на трывогу званы,
      Б’юць, б’юць!..
 
1914
 
 
 
 
Падабаецца     Не падабаецца
2009–2019. Беларусь, Менск.