Іх сышлося пяцёх на крывіцкіх палёх, На абшары ня Божым ці Божым, I давай разважаць, і давай так казаць: Найвышэйшую раду заложым. Бо ўсялякіх спакус мае шмат беларус, I да ўлады ён мае нахілы, А найлепш, як нас пяць будзе ўладу спраўляць Над народам, які для нас мілы. Як казалі з сабой, так зрабілі, як стой, Найвышэйшую раду зьляпілі; Папілі барышы, пабылі на імшы I ў сэнатарскі чын уступілі. Дзень жывуць і другі, а людзей ні крыхі, – Не сьпяшыць штось падданы з паклонам, Хоць зарэж, а ня йдзе, вось і вер грамадзе! А тут сноўдаюць цені ў чырвоным. Трэба раду як даць, – так іх раіцца пяць, – Трэба ўсіліць дзяржаўную ўладу... I спазналі яны, што тут «маркі» адны Ўладзе будуць найлепшай прынадай. У сваім пачуцьцю падвялі пад стацьцю, Што ня стыд, хоць і ў чорта ўзяць грошы, А тым болей, калі дні такія пайшлі, Што падданы ад чорта стаў горшы. I пайшлі упяцёх за высокі парог Да «крэсовага» яснага панства; Ў «пшэдпакоі» падрад сталі, як на парад, Сэнаторскага поўны падданства. Пазіраюць кругом, штосьці шэпчуць цішком, А ля іх – ім на дзіва да сьмерці, – Беларускі расол белы хлебча арол, Да то ўправа, то ўлева хвост верце. Так стаяць, хоць і страх, а тут дзьверы шарах! Лёкай ткнуў ім «крэсовы пачушак»... Мігам выйшлі яны, – рады, хоць на штаны Для сябе н а с т а я л і «касьцюшак». I жывуць зноў сабе, а падданы ня йдзе, А чырвоны цень цісьнецца ў дзіры; Дык зноў сушаць мазгі, як схадзіць раз-другі, Сэнаторскія сшыць каб мундзіры...
1920
|
|