Гэй, вольныя птахі, саколія дзеці!
У вырай! Да сонца вясёлкавым шляхам!
Час сонца схапіці і сонцам ірдзеці
I зьведываць сьветы арліным узмахам.
Гэй, вольныя птахі, патомкі крывічаў!
Да неба! Па зоры і гром перуновы...
Час крыльле расправіць – пагудка ўжо кліча,
Ўжо віхры цярэбяць да шчасьця шлях новы!
Гэй, вольныя птахі, ўладарнікі песьні!
На шляхі, пад сьцягі красы і свабоды!..
Час вылецець к славе з пагібельнай плесьні
I песьняй агністай дзівіці народы.
1920
|
|
