Дуб не прыдбаў
Ані лісьціначкі.
Стаіць,
Нібы Кашчэй кашчавы.
А ўжо стракатыя хусьціначкі
Зьбіраюць маладое шчаўе.
Смуга дрымотная,
Злянелая
Пагоднее ад іх усьмешак.
I пальчыкі,
Узелянелыя,
Халодзіць козытна
Узьмежак.
На поплаве
Агонь уздрыгвае:
Пячы вячэру
Будзе прысак,
У дыме коні –
Дымнагрывыя.
Дым сьцелецца
Па ўзлобках лысых.
Арэхаўна,
Замошша,
Плігаўкі –
Прыціхлі вёскі ў весьнім гудзе.
Дзяўчаткі ў тумане,
Як кнігаўкі,
Стамлёны адвячорак будзяць.
|
|
