РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Рыгор Барадулін
Вершы
Кантэкстны тлумачальны слоўнік
Белая яблыня грому
Белая яблыня грому
Чорных садоў ліхалецьця.
Яблык яе нікому
Не пажадаю на сьвеце.
Голая яблыня грому
Жахам жагнала прысьмерк.
Пэўна, што д'яблу самому
Помніцца горкі прысмак.
Сьветлая яблыня грому
З салаўінае усяночнай.
Ласкавага яблыка стому
Я надкусіў аднойчы.
Ціхая яблыня грому,
Першага мілага гневу.
Позірку маладому
Праглася бачыць Еву.
Добрая яблыня грому,
Радасьцю поўні наўкольле!
Хай жа ня будзе злому
Гольлю твайму ніколі.
Белая яблыня грому,
Клопатам, гаманою
I на апошнюю строму
Сьветла ўзыдзі са мною.
 
 
 
 
Падабаецца     Не падабаецца
2009–2019. Беларусь, Менск.