РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Рыгор Барадулін
Вершы
Кантэкстны тлумачальны слоўнік
Тэст пацьвердзіўся
Як толькі пачаў я «конікаў пасьці»,
Абапіраўся на локці без дапамогі мамы,
Быў апрабаваны ўпершыню ў жыцьці
Сялянскім тэстам,
Старажытнейшым самым.
 
Мае задаткі і схільнасьці
Былі правераны
Без асаблівых хітрыкаў так:
Перада мною паклалі
Кавалак паперыны
I толькі што выцягнуты з катла бурак.
 
Да чаго пацягнецца ў малога рука,
Лёсам такім будзе ён залучоны:
Араты, сейбіт –
Да бурака,
Да паперыны –
Чалавек пісьменны, вучоны...
 
Я да бурака пацягнуўся,
Паразважаўшы крыху,
I распагодзіўся бацька ў паглядзе.
Ён мне паказваў,
Як мужык вытрахае саху
I як барсук дзяцей сваіх гладзіць...
 
Пацьвердзіўся тэст:
Зь відна да цямна
Ару я даволі
I сею ўволю:
Насеньне чорнае,
Белае поле.
 
Што родзіць ня густа –
Мая віна!
 
 
 
 
Падабаецца     Не падабаецца
2009–2019. Беларусь, Менск.