Шкадуй пустэльніка, зіма, Замецены будан у полі. Як самагубства, як турма, – Пустэльніка ліхая доля. Жыве на хлебе і вадзе І дзякуе за гэта богу. А ім палохаюць дзяцей, Якія хочуць ведаць многа. Пустэльнік ён, ён награшыў. А што, астатнія – сьвятыя? Ён закахаўся ад душы У панну зь іменем Марыя. Была багатая яна, А ён манашак абадраны. Што манастырская сьцяна – Калі ты, браце, закаханы! І ён пайшоў усьлед за ёй. Раней хадзіў так за іконай. І ён назваў яе сьвятой, І ён назваў яе мадоннай. Яна ж сьмяялася адно: «Ты малады і невясёлы. Ня курыш і ня п’еш віно, Яшчэ й жанчын баісься голых...» Манах абразы не стрываў, Дагнаў, абняў, нібы здурэлы, І доўга панну цалаваў, Каб паказаць, які ён сьмелы... Які тут грэх? А ён адчуў Свой грэх. Да болю сьціснуў вусны, Аж хмары зьбегліся ўваччу: «Вялікі грэх кахаць распусных!» Шкадуй пустэльніка, зіма, Замецены будан у полі. Як самагубства, як турма, – Пустэльніка сьвятая доля.
|
|