Зноў чорная кава, як лекі ад сьмерці, У кубачку белым на шэрым стале. У шыбу маю лісьце кідаюць чэрці, Каб я не пабачыў, што на памяле Прыгожая ведзьма над Менскам лятае. Прыгожая ведзьма, як сьмерць, маладая. Палю цыгарэту і дым сіняваты Плыве да вакна і паўзе па вакне. Раней я любіў і віно, і гарбату, Цяпер толькі кава суцешыць мяне. Спакусная ведзьма над Менскам лятае. Спакусная ведзьма, як ноч, маладая. А я адзінокі, нібыта сабака, Завыць адзічэла хачу і маўчу. І чорную каву глытаю са смакам І ў неба за дымам праз фортку лячу Да ведзьмы чароўнай, што мройна лятае... Вар’яцкая ведзьма, як я, маладая...
|
|