РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Ніл Гілевіч
Вершы
Кантэкстны тлумачальны слоўнік
*  *  *
Родная, мілая, любая!
Сьвет заімгліўся журбой.
Непагадзь страшная, лютая
Нас не мінула з табой.
Зь яснае пэўнасьці выбіла.
Згасла вясёлка-дуга.
Вочы праменныя выпіла
Чорная скруха-туга.
 
Мілая, любая, родная!
Як ты далёка была!
Як, непрытульна-халодная,
Вечнасьць марудна плыла!
Днямі пустынна-вятрыстымі
Стыла ў самоце душа,
Покуль, як лодка да прыстані,
Радасьць да сэрца ішла.
 
Любая, родная, мілая!
Зноў я адчуў, што жыву.
Ясьніцца далеч імглівая.
Сьвет разганяе журбу.
Холад далоняў ня выстудзіў.
Сівер ня выдзьмуў цяпла.
Д’ябал у Бога ня высудзіў
Тое, што ты мне дала.
 
22.V.1994.
 
 
 
 
Падабаецца     Не падабаецца
2009–2022. Беларусь, Менск.