Баляда Сяргея Палуяна
|
19.10.1890 – 24.04.1910
|
Зьмяёй сьціскае горла адзінота І кожны дзень усё мацьней, мацьней І так, што жыць на сьвеце не ахвота Сярод самотных, як крыжы, людзей У родным краі, што ня мае волі. Бяз волі зьнікне мова і народ, Як і бяз мовы родны край ніколі Краінаю ня будзе... Чорны лёд Пад сонцам растае, вадой сьцякае Па вуліцы, кудой дамоў ідзеш. І прад табой вада, як залатая, І, як са срэбра, прад табой капеж Усё танчэйшы з кожным днём вясновым, Нібыта нітка, на якой вісіць Тваё жыцьцё. І ў творы ткуцца словы Твае, якім і безь цябе тут жыць І дачакацца часу залатога У Беларусі, для якой і ты Праз сум да волі пракладаў дарогу, Застаўшыся ў самоце маладым.
13.VI.2010.
|
|