Нам ня сьпіцца... Пра гэта Мы гаворым: ня сьпіцца Нам таму, што над сьветам Гудзе навальніца!.. Так, што праўда – то праўда... Навальніц незьлічона... Набываем мы «заўтра» I губляем «учора», Безьсьмяроцьцю на поед Дні трасём з кашалёў, Як білеты на поезд, Які адышоў. Гэта – страх небыцьця. Страх пякельна гарачы. Нам інстынкт да жыцьця Захаваны ад прашчураў, Птушак, рыб і зьвяроў, – Але хто з нас заплакаў бы, Раскаціўшыся ў гром Нейкай ноччу маланкавай! Хто заплакаў бы – дрэвам Прабіўшы трысьцё! Каб жыцьцё – не дарэмна. Не дарэмна жыцьцё. ...Ноччу залівень-лівень. Гром... I, хочам – ня хочам, Мы уночы маўклівей I сьвяточней уночы.
|
|