Душа, як ні прагнецца ёй,
Ня можа вярнуцца ў паганства:
Лясы – апірышча і прытулак –
Павысечаны, пакарчаваны, патраляваны,
Рэкі – у іх бруд і пыл змываўся –
Павысушаны, павыпрастаны, павыпіты.
Як ацішэць, абымшэць, адтаць?
Куды ні кінься – парасьнікі, хмызьнякі.
Як пераседзець бяду
З чарацінкай у роце,
З пластмасавай,
Кактэйльнай у водападобнасьці,
Вясёлкавай ад мазуту,
Падступнай ад радыяцыі?
І непрытомная душа ў паганстве
Асланяе сябе крыжам,
Крыжам чарговай магілы...
|
|
