М. І. Забэйду-Суміцкаму Гэта спадчына Мне засталася ад прадзедаў – Гэта матчыных Песень дзівоснае прадзіва: I вясёлых, I сумных, I сьлёзных, I грозных... Песьні гэтыя Продкі складалі калісьці, Бераглі, Не сцураліся, Не адракліся: Ані ў стайнях – Пад панскімі бізунамі, Ані ў храмах – Зь ненаскімі абразамі. Не гадамі – Глухімі, як поўнач, Стагодзьдзямі, Калі ў поле вясною З сахою выходзілі, Калі ўвосень мякіну Бязьменамі мералі, – Продкі ў долю I ў песьню шчасьлівую Верылі... Ты журылася, песьня, Ты плакала, песьня, – Русакосай, Пахілай вярбою над ставам, Сіратой Над убогай магілаю маці, Адзінокай зязюляй У белым бярэзьніку... Сумавала Рабінай у полі асеньнім, Жураўліным ключом У захмараным небе, Ветрам зімным У коміне хаты сялянскай... Галасіла наўсхліп У застольлі вясельным, Абягала сьлязьмі На дары, на палотны, На падушкі, Што мулкімі будуць Да скону... Калыхала калыску На рваных пастронках, Калаўротам Гудзела ў цішы вечаровай, Напівалася п'яна ў карчомцы На сьвята, Па аселіцах росных Блукала ўначы. Шаргацела сярпом, Шалясьцела калосьсем, Шапацела сухім мурагом Пад граблямі I толькі ніколі-ніколі Не шамацела рублямі!.. Званочкам Пазвоньвала на начлезе, Рассыпалася Сьмехам дзявочым па лесе, Адгукалася Рэхам па ўзгорках і ў долах, Булькатала крыніцай У засені ясеняў, Ручаінай журчала Па чыстых каменьнях, То ля самага сонца – Высока-высока – Трапяталася жаўранкай У сіняве. То плыла на плытах – Па Дзьвіне, Па Дняпры, Па Бярозе, То ў закуранай кузьні Гула на кавадле, Як звон, То дубоваю восьсю Стагнала ў чумацкім абозе, У далёкай дарозе, У сьпёку, У слоту, У золь. То з апаленым крыльлем, Як птах асірочана-грозны, Узьлятала, кружыла Над вогнішчамі па начах, Закідаючы іскры У сонныя панскія гнёзды – Пад маўклівай ухвалай Навостраных кос На плячах. Часта думаю: Што, каб ня матчына песьня? Чым бы дыхаў? На холадзе чым саграваўся б? Папрасімцам, напэўна, Бадзяўся б па сьвеце, Жабраком Між чужых і радні Пабіраўся б. З чым пайшоў бы я ў госьці Да добрых суседзяў? Чым адзьдзячыць бы змог За дары іх ад сэрца? Хто б мяне Паміж трох міліярдаў Разгледзеў? Хто б мяне распазнаў I, як роўнага, стрэціў? А цяпер – Валадар я нязьлічаных скарбаў, I другім не зайздрошчу – Прызнацца папраўдзе, I ніхто не пачуе Ні крыўды, ні скаргаў, Што ня кінуў нічога Мне ў спадчыну прадзед. Мне з табою, мой скарб, На планэце ня цесна, Я з табой – I вялікі, I знатны, I дужы. Я хачу зьберагчы цябе, Матчына песьня, Каб запоўніць табою Спусьцелыя душы! Я хачу Пасяліць цябе ў сэрцах Нашчадкаў, Каб ніколі мяне Папракнуць не змаглі, Каб было перад сьмерцю Мне лёгка ад згадкі, Што я жыў недарэмна На роднай зямлі.
"Полымя". 1963. №11.
|
|