Сярод лясоў наднёманскіх, Густога сасьняка Жыла малая Верачка – Дачушка лесьніка. Яна дружыла з дрэвамі, З птушынаю сям’ёй, Зьвярынай усялякаю I зь ягадай лясной. Ды вось аднойчы восеньню Лес, чуе, не пяе, І стала ёй нявесела, Сум агарнуў яе. Шкада ёй ападаючых Лістоў і матылькоў, Шкада ёй адлятаючых У вырай журавоў. I вось пацешыць Верачку Жучкі прыбеглі спрытныя, Камарыкі гульлівыя, Мурашкі працавітыя. Гудуць, зьвіняць і раяцца Ад ранку да начы, Ня знаюць, як гаротніцы Ў бядзе дапамагчы. Прыбеглі зайцы шэрыя, Вавёрачкі гульлівыя, Бабры, лісіцы, вожыкі, Казулі палахлівыя. Паселі кругам, раяцца Ад ранку да начы, Ня ведаюць, як Верачцы Ў бядзе дапамагчы. Усёй сям’ёй зьявіліся Цецерукі стракатыя, Глушцы, вароны з совамі Ды зь дзятламі насатымі. Сядзяць на дрэвах, раяцца Ад ранку да начы, Ня ведаюць, як Верачцы Ў бядзе дапамагчы. Пачуў пра гэта павучок, Пытае: – Што за гул? Мо’ я, сябры-таварышы, Як-небудзь памагу? – Ну, дзе табе! Маўчаў бы лепш Хы ў засені лістка, – Гавораць і сьмяюцца ўсе З малога павучка. I ён па павуціначцы, Пакрыўджаны, палез Дамоў, пад ліст арэхавы, У хмызьнякі, у лес. А як настала ночанька, Серп месяца зазьзяў, Ён павуціну тонкую Хутчэй снаваць пачаў. Ад кусьціка да кусьціка, Між лапак і галін, Ад елкі да сасоначкі, Ад неба да зямлі. А потым зоры ясныя З краплістаю расой Павесіў ён званочкамі На павуцінцы той. Калі ж прачнулася зара I ветрык прыляцеў, Лес залатымі струнамі, Ажыўшы, зазьвінеў. На звон устала Верачка. Сьцяжынаю лясной Ідзе яна і дзівіцца, Што лес сьпявае зь ёй. Кране рукой рабіны куст – Звон чуецца рабінавы, Кране яна каліны куст – Звон чуецца калінавы. А сонца струны павучка Кране празрыстым променем, Заслухаесься, як гудуць Лясы-бары над Нёманам.
1950
|
|