Дарма шукаеш, мілы,
Мне ў падарунак песьні, –
Нідзе такой ня знойдзеш,
Як у маім у сэрцы.
Дарма ўначы дадому
Ісьці дапамагаеш, –
I так заўсёды радасьць
Мне азарае сьцежку.
Дарма ты ахінаеш
Мяне ў час непагоды, –
Вясновай ласкай грэе
I так маё каханьне.
Дарма мяне былінкай
Уверх ты падымаеш, –
Вышэй за наша шчасьце
Ніколі не падымеш.
Але, хоць і кажу я
«Дарма» табе, мой мілы, –
Ня будзь ніколі іншым,
Ня будзь ніколі іншым!
1952
|
|
