Вечар вясеньні. Месяц над гаем. Спакойнай ночы! – ўсім я жадаю. Спакойнай ночы! – гулкаму рэху, Каб не было чуць, як буду ехаць; Псам паляўнічым, што госьця чуюць, Двор запаветны пільна вартуюць; I тым варотам ля цёмнай ліпы, Каб адчыніць іх мог я бяз скрыпу. I, асабліва, спакойнай ночы Маці, якая за дочкай сочыць, Каб не пачула яна да рана, Як буду клікаць выйсьці на ганак, Выйсьці на ганак дзяўчыну-зорку, Жыць безь якой мне на сьвеце горка. Вечар вясеньні. Месяц над гаем. Спакойнай ночы! – ўсім я жадаю.
1953
|
|