Даваў слова сабе, Мо' раз дзесяць ці дваццаць, Не пісаць больш табе, Да цябе не зьвяртацца Зь нейкім новым любоўным Пісьмом, маніфэстам, Бо ты стала другой I другога нявеста. Але я не ўлічыў Шуму стромкай таполі, Ля якой мы з табой Сустракаліся ў полі. А яна, як тады, Зноў шуміць над ракою. Не ўлічыў я і рэха Той песьні начлежнай, Што сьпявалі з табой На прасторах бязьмежных. А яна, як тады, Не дае мне спакою. Каб знаў гэта раней, Ці ж я змог бы згадзіцца Так далёка ад шчасьця Свайго пасяліцца I лісты табе слаць Да запатрабаваньня. Ты ж баішся ўспамінаў – Чытаць іх ня станеш.
1954
|
|