Ён расьце каля дарогі,
Ён цьвіце агнём блакітным,
Незвычайным, ад якога –
Цеплыня ў кустах ракітных.
Цень яго надзейным сховам
Служыць для вульлёў чмяліных,
Для ватаг баравіковых,
Вывадкаў цецеравіных.
I ня дзіва, што заўсёды,
Калі расьцьвітае лубін,
У ліхую непагоду
Шаракі тут грэцца любяць.
I самому тут уцеха
Ў зеляніне прытаіцца,
Калі знаеш пушчы рэха,
Калі любіш пах жывіцы.
1961
|
|
