Ciahniecca, placiecca
Padarožny ŭ dal, –
Niama dzie padziecca,
Dušu muča žal.
Noška za plačyma,
Kijok u rukach,
Sincy pad vačyma,
Mlavaść u nahach.
Čakaje z tryvohaj
Nočki, letnich bur;
Ścielecca daroha,
Jak viaskovy šnur.
Pa bakach biarozki –
Prysady stajać,
Dalej – pole, vioski
Rodnyja vidać.
Tam – plech sienažatki,
Pasievy, papar;
Tam, jak babki, chatki
Siełi ŭ doŭhi šar;
Tam snuje araty
Z kryvulaj-sachoj;
Tam smyčok zubaty
Skača nad ralloj;
Tam chodzić skacinka,
Aviečka blaje,
Tam hradki dziaŭčynka
Pole dy piaje.
Bača padarožny,
Bača heta ŭsio,
Dumkaju tryvožnaj
Markocić žyćcio.
Hej vy, chatki, pole!
Vy, ludcy maje!
Hej ty, dola, dola,
Dzie łaski tvaje?
Miljony zahonaŭ
Ziamielki lažyć,
Chacinak miljony
Na ziamłi staić.
Čamu ž mnie, kalecy,
Leta ci zima,
Čamu ž mnie padziecca
Niama dzie, niama?
Ciahniecca, placiecca
Padarožny ŭ dal;
Serca płača, rviecca,
Dušu muča žal.
[1905–1907]
|
|
