|
Hej, pajechaŭ syn Daniła...
|
|
Pieśnia na vajacki ład
|
Hej, pajechaŭ syn Daniła
Vajavać na vajnu,
Ad napadu, ad niavołi
Baranić staranu.
Syna maci vypraŭlała,
Kryž na pamiać dała,
Kab matulu rodnu pomniŭ,
Jak pajedzie ź siała.
A dziaŭčyna, miła sercu,
Praviała za siało
I dała na pamiać pierścień,
Kab u bojkach viazło.
Tak pajechaŭ syn Daniła
Sam saboj na vajnu,
Azirnuŭsia na chacinu
Dy zmachnuŭ ślazinu.
Jechaŭ pole i druhoje,
Trećcie pole daścih,
Dzie sabrałisia žaŭniery
Ź sioł i viosak ŭsich.
I pajšłi jany pachodam,
Družna, śmieła pajšłi,
Kab von złybiadu prahnaci
Ź biełaruskaj ziamłi.
Dobra ŭsie tam vajavałi, –
Umirałi ŭ baju.
A najlepš Daniła biŭsia
Za krainu svaju.
Chto jšoŭ zzadu, a chto zboku,
Aziraŭsia nazad,
A Daniła ŭsiudy ŭpierad
Vystupaci byŭ rad.
I ručyła, šancavała
Ŭ bitvach ciažkich jamu,
Ažno vorah napužany
Dzivavaŭsia tamu.
Hod minuŭ, jak vajavaci
Šoŭ Daniła ź siała,
A ŭžo słava pa ŭsim śviecie
Ab im hromka išła.
Jak ačyściłi vajaki
Kraj ad voraha svoj,
Važna jechałi dadomu,
Jak tych pčoł bujnych roj.
A napieradzie ŭsich jedzie
Naš Daniła z vajny,
Šabla błiskaje pry boku,
Koń pad im bułany.
Jon viazie ŭsim padarunki:
Maci srebny abraz,
A svajej dziaŭčynie miłaj
Doŭhi pacierak źviaz.
1919
|
|
