Сьнег бялеецца ў вышынях, На гары, на стромкай скале, Кветкі квецяцца ў даліне, – Ў сонцы, ў кветках Генацвале. Было люба мне ў Цхалтуба, У жыватворнай цёплай цхалі, Было люба, як галубіў Цябе ў думках, Генацвале. Ты лячыла ўсьмешкай мілай, Твае лекі чаравалі, Сны чароўныя будзіла Ты, грузінка, Генацвале. Ой, паеду я далёка, Сэрца сьціснецца ад жалю, Будзе сумна, адзінока Безь цябе мне, Генацвале. Будуць сьніцца скалы, горы, Грузіі цудоўнай далі, I адна ты зь ясных зораў Сьніцца будзеш, Генацвале. Эліко, маё сьвітаньне, Смутна зоркі мне міргалі... «Суліко» на адвітаньне Прасьпявай мне, Генацвале!
1938
|
|