Гутарка аб кепскім гаспадару
|
Кепска, калі кепскі Ўдасца гаспадар, – Сам у сваім доме Ніякі ўладар. У яго парадак – Адпусьці ты грэх: I сабе на гора, I людзям на сьмех. * Хата ў яго, хата – Дзіркі на страсе, 3ь печы дым ня ў комін, А пад столь нясе. На курынай ножцы Пуня і хлявок, – Вецер ім салому Закасаў набок. Зруб у студні зьехаў, Гразь цячэ ў ваду, I асьвер, і вочап Толькі на бяду... А платы навокал – Тын і частакол, – Дзе гнілая жэрдка, Дзе зламаны кол. * Чыста ў яго, чыста – Лад вядзе стары; Лому, гною кучы, Хоць ты падбяры. 3 гноем пад нагамі Граблі, вілы, крук, Пад акном у лужы Рыецца парсюк. Рыцьвіны ды ямы Па дзядзінцы скрозь, Ажно, калі глянеш, Разьбірае млось. Сам ён непамыты Лета і зіму, – Дзедаў дзед ня мыўся, Дык чаму ж яму?.. * Статак яго, статак Не знайсьці нідзе: 3 поля і на поле Чуць ідзе-брыдзе. Конь сьляпы, з ахватам, Ходзіць абы-як, Ёсьць адна карова, I ў таей кільчак. Кашаль свіньню душыць, Ног ня ўзніме кныр, «Матылі» ў авечак – Круцяцца, як вір. Вылезла ў ягняці Воўна дачыста, А цялё за хлевам Ходзіць без хваста. * Праца ў яго, праца – Мабыць, згультаеў: Рана спаць кладзецца, Позна ўстае. Дзе там нейкі трактар, Дзе там нават плуг: Ён сахой, як прадзед, Гоні верне ў круг. Паарэ на ўзрэхі, Куст расьце – расьці! Церабіць ня варта, Можна абысьці. Бараны жалезнай Не спанатрыў ён, – Смыкам дапатопным Ёрзае загон. Сеяць жа як выйдзе Гэты свой узрэх: Дзе насыпе кучу, А дзе голы плех... Збожжа ў яго, збожжа – Дзякуй ні за грош: Неабходных дзёран, Як абходных, больш. Жыта паспляталі Гірса ды званец. У пшаніцы «сажа», Дурнап'ян-дурэц. Вераб'ю авёсік Толькі да калень. Адно толькі вусьсе Выпусьціў ячмень. Бульба, як арэхі, Па тры пад карчом, Боб, гарох, капусту Збэрсала сьвінчо. * Возіць з поля, возіць, Што ня згноіў дождж, – Не зьбярэ ўмалоту – Каласы, як хвошч. Малацьба надыдзе, Бо патрэбен хлеб, Нашто малатарня, Балазе ё цэп. Таксама на арфу Не прыйшла пара, – Веялкай навее Кубялок дабра. Млын хоць недалёка – Не прывык яшчэ: Зьмеле ў жорнах жыта, У ступе круп стаўчэ. * Сядзе есьці, сядзе За кульгавы стол, Траяногі зэдаль Чуць ня рыне ў дол. Груца ды зацірка, Цэд, цура, кісель, Мілта, саладуха – Амаль стравы ўсе. Ані тэй закрасы, Ані скваркі тэй, Бульба з мундзірамі, Хлеб нібы з пасей, Бліны, верашчака – На паўгода раз, Нават чамяруха Рэдка ў які час. * Едзе ў госьці, едзе – Запрасіў камрад, – На чым сьвет скаголіць Кволы панарад. Не падмазаў колаў, Колы і скрыпяць, Па вандолах скачуць Ні ў дзесяць, ні ў пяць. Загваздкі, атосы – Па адной няма. 3 восі лезе шворан Угару старчма. Конь той клыпу-клыпу, Сем гадзін – вярста; Вонкі хамуціна Прэцца з хамута. Плеценая вобраць – Адны матузы, Галаву шмальцуе Горш ад дзермязы. Што ні крок – супоня Рвецца, як аб пень, I гужы з дугою Злазяць з аглабель. Падсядзёлак зьехаў Аж пад бруха ўніз, А чэрасьсядзельнік Пад калёсы зьвіс. Набадрыкі-зрыўкі Шыты навырост, Ляйчыну з вузламі Конь злавіў пад хвост. Замест нейкай пугі Стусіна-дубец. Але й той з двара ўжо Сьсьцёбаны ўканец. * Едзе ў госьці, едзе... Едзь жа ў добры час! ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ Кепска, калі кепскі Гаспадар хто з вас.
1926
|
|