РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Сыны
Сыноў бацька сваіх кліча
        На параду ў хату,
А ўрачыста як бы кліча
        На якое сьвята.
 
I з павагаю пытае
        Кожнага ў асобку,
Кім зь іх кожны быці хоча,
        Якім жыць заробкам.
 
*

– Бо, сыны мае, – так кажа, –
        Жывіцё ў краіне,
Чалавечая дзе праца
        Намарна ня гіне.
 
I сыны адказ трымалі
        Перад бацькам родным,
А стараўся зь іх быць кожны
        Свайго бацькі годным.
 
*

Першы кажа: – Землі буду
        Трактарам варочаць,
Каб рунелі, зелянелі,
        Аж ясьнелі вочы.
 
Каб расьлі ў рост чалавека
        Жыта і пшаніца,
Каб аж госьці к нам з-за сьвету
        Ехалі дзівіцца.
 
*

Другі кажа: – На заводзе
        Быць хачу даўно я,
Дзе чыгун ракою льецца,
        Дзе зьвініць сталь звонам.
 
Будаваць буду дзень цэлы
        Домны і мартэны,
Медзь і вугаль браць у дзела
        Ад шахтаў падземных.
 
*

– Плаваць я пайду на мора, –
        Сказаў гэтак трэйці, –
Дзе «Чэлюскін» горда плаваў,
        Дзе пурга, дзе вецер.
 
Ад халодных да гарачых
        Мораў рэйс мой будзе.
Параход мой будзе грозна
        Рэзаць хваляў грудзі.
 
*

Сын чацьвёрты: – Хочу лётаць
        Птушкаю крылатай,
Мераць неба ў самалёце
        Над тваёю хатай.
 
Арлянём сябе ў сьне бачу,
        Ня знаю спакою...
Хачу быць я, мой ты бацька,
        Лётчыкам-гэроем.
 
*

– Байцом буду я чырвоным, –
        Пяты кажа гэтак, –
Сьцерагчы граніцы-межы
        Краіны Саветаў,
 
Каб наш вораг пры нападзе
        Сустрэнуў магілу.
Байцом буду, каб зь мяне быў
        Рад сам Варашылаў.
 
*

А сын шосты: – Складаць песьні
        Буду, колькі змогі,
Пра вялікія падзеі
        Сталінскай эпохі:
 
Як працуем, як зьнішчаем
        Здрадныя напасьці,
Як будуем, як ствараем
        Казачнае шчасьце.
 
*

Так сыны адказ трымалі
        З гонарам юначым,
Свае выказаці думкі
        Ня ўмелі іначай.
 
Бальшавік быў іхні бацька,
        Пралетарый родам,
Зьведаў сушы, зьведаў моры,
        Бітвы і паходы.
 
1935
 
 
 
 
Падабаецца     Не падабаецца
2009–2019. Беларусь, Менск.