Здаецца ж, было гэта ўчора...
|
Здаецца ж, было гэта ўчора, – Як сёньня, шумелі бярозы, – Калі на няплодных разорах Кацілася гора і сьлёзы. Аб цяжкіх начлегах напевы Каціліся з краю да краю; Былі неўраджайны засевы, Было галаданьне ў звычаю. Здаецца ж, было ўчора гэта, – Плылі воды ў мора, як сёньня, – Калі ты ня бачыў прасьвету, Што збудзецца заўтра на гонях. Стаяў перад будучым сьвечкай, Якая згасае бязь сьледу; Плыла сьлепата мутнай рэчкай Да бацькі, да ўнука ад дзеда. Было ж гэта ўчора, здаецца, – Як сёньня, шумеў бор зялёны, – Сабе не знаходзячы месца, У процьму ішлі міліёны. Ішлі. Ад крыві ныла цела, Чакалі збаўленчага цуду: Нядоля, няволя гудзела, Адвечным гула перагудам. * Забурліла сіне мора Ад віхроў, Выйшлі Волгі, Дняпры выйшлі 3ь берагоў. Разбудзіла мора сьпячых – Уставай! Вазьмі свой ад ліхадзеяў Каравай! Цячы, кроў, жывой крыніцай Па зямлі, Каб па-людску дзеці, ўнукі Жыць маглі! Вее, вее ўсходні вецер, Вее ў даль, Векавечнае пракляцьце Біць ня жаль. I разьбілі пераможнай Барацьбой. Байцы сёньня ўспамінаюць Быўшы бой. Загасьціла прасьвятленьне I цьвіце, Няма думак аб нядолі, Аб кнуце. Зашумелі над ракою Трысьнягі, Аквяціла ясна зелень Берагі. Па сялібах непрабудны Згінуў сон, Прад вачыма шлях у сонцы Новых дзён.
1935
|
|