Вясна прыйдзе, сьнег пагіне,

Вышэй сонца хадзіць стане,

Промень ясны ўсюды кіне,

Рунь падыме на паляне.

З гор пальюцца перавалы,

Раскуюцца рэчкі з шумам,

Выйдзе з хаты стар і малы

Гаманліва дружным тлумам.

Убярэцца лес бязьлісты

У гарнітур свой зялёны,

Шугне вырай галасісты,

Камары заб’юць у звоны.

Зашуміць трава густая,

Кветкі ў лузе засьмяюцца.

Вясна прыйдзе маладая,

Ўсюды песьні панясуцца.