Вагон калыша. Позьні дождж

Бесперапынна ў шыбы б'ецца.

На струнах рэек – думы, ноч,

Этап ды чорны, мокры вецер.

Зь імглы ўспамінаў устаюць

Пакінутыя лес і нівы,

Дзе хмары над рачным абрывам

Чаўнамі белымі плывуць.

Зноў бачу, як ідзе ў паход

Натоўп шматтысячны і грозны,

Сьцягоў чырвоных, і адозваў,

I песень сонечных узьлёт...

Вагон калыша. Позьні дождж

Бесперапынна ў шыбы б'ецца.

На струнах рэек – думы, ноч,

Этап ды чорны, мокры вецер.