Я прынёс іх зь ляснога дрымучага сьвету,
Дзе з брусьніцамі ніцымі – жар верасоў.
Падасінавікаў у чырвоных берэтах
Пад старою асьвінай асінай знайшоў.
А лісічак набраў каля сьцежкі-вяртухі,
Што да хаты лісінай лагчынай вяла;
Падбярозавікаў – пад бярозай-шаптухай,
Дзе капэла чмяліная пела-гула.
Сыраежак знайшоў дзе памежак-узгорак
Мураўі занялі для паселішч сваіх;
А апёнак – ля пнёў і ля сховішч вавёрак,
Жоўтых махавікоў – між імхоў баравых.
А рыжкоў і ваўнянак нарэзаў багата
Там, дзе лічыць зязюля гады па вясьне...
А пра баравікі не скажу, каб адна ты
Не пабегла шукаць іх у лес безь мяне.