Сьнег ляжыць вокал суровы і белы, Хоць добрым слаўцом мяне, мілы, сагрэй, Рукі ад сьцюжы мае зьледзянелі, Сэрцу, здаецца, яшчэ халадней... Ў безнадзеі цяжкую хвіліну, Гдзе ні паглянеш – крыжы і крыжы, Прыйдзі хоць уявай, прыйдзі успамінам, Далоні на скроні мае палажы. Каханьне – то з думкамі думкі гамоняць, Дзеляцца шчасьцем няўлоўным ў цішы, То вусны на вуснах, далоні ў далонях, Сьвятасьць у сэрцы і песьня ў душы. Хоць песьняй ўварвіся ў пакоі пустыя, Нотаю мілай ў бяссоннай начы, Цудоўная, ўзьнёслая «Авэ Марыя» Няхай ў адзіноце маёй прагучыць. А я пацалую зноў скроні спацелыя, Коўдрай прыкрыю, накапаю лек, Як ў ночы, калі бушавала мяцеліца I сьцежку да хаты засыпаў нам сьнег. Чало Тваё мудрае ціха пагладжу, Яшчэ пакладу Табе грэлку да ног. Я тая ж, такая ж, якую Ты ўбачыў I болей ўжо выпусьціць з хаты ня змог...
|
|