РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Рыгор Барадулін
Вершы
Кантэкстны тлумачальны слоўнік
Дзякуй
Тым застольлям,
Тым пасьцелям –
Дзякуй,
Дзе я гасьцяваў,
Дзе начаваў,
Дзе сябе, як дома, пачуваў,
Дзе была падушка дужа мяккай.
 
Дзякуй тым стагам
I тым стажынкам,
Што хмялілі ночы мурагом,
Дзякуй тым сьнягам
I тым сьняжынкам,
Ад якіх сьвятлела ўсё кругом.
 
Дзякуй
Пакравам,
Дзядам,
Калядам,
Што чакалі з даўнасьці мяне,
Ручнікам,
Ад сіверу каляным,
Чэснай крыўдзе
I нязлой мане.
 
Дзякуй той,
Ад ямін васпаватай,
Сьцежцы спорнай у сваёй хадзе,
Што на гэты сьвет
Вяла з павагай
I на той
Спакойна павядзе.
 
Не была вада з крыніцы даўкай.
Доля думкі вольнымі пасла.
 
Загадзя
Зямлі
Кажу я дзякуй,
Баючыся не пасьпець пасьля...
 
 
 
 
Падабаецца     Не падабаецца
2009–2019. Беларусь, Менск.