Ў той дзень зямля сьвятло і празарэньне Дала яму. Ён спаў між райскіх дрэў, Ня зьведаўшы яшчэ грэхападзеньня, – Як кветка, як алень, як зоркі сьпеў. Травою пахнулі яго далоні, Бег цень ад Дрэва Дабрыні і Зла. А побач верылі дрымотна коні У вечны сьвет бяз бойняў і сядла. І сьніў Адам: Камета ўстала ў небе Барвяным страшным зракам – і тады Крывёю пачала сачыцца глеба І згінулі эдэмскія сады. І пакаціўся ён, бяздольны, голы, Як пералёт, адсохлы на карню, Насустрач болю і насустрач волі, Насустрач злу і сернаму агню. І сьніў Адам: Зямля ў глыбінным лоне Няволю нараджае для жывых. Дрымотныя, даверлівыя коні Ў бяздоннай захлынаюцца крыві. І сьніў Адам: да сьветлых зор сусьвету Імчыць, як лямант, шматвяковы жах, – Кроў Іліяды, попел Плошчы кветак, Рагнеды плач і Хірасімы прах, І дыбіцца шалёны сьвет гарою Над цалаванай брызам і вадой, Карункавай ад сонца і прыбою, Блакітнаю каралавай градой. ...Туды... Сюды... ...Туды... Сюды... Над прыскам, Над цішынёй, дрыжачай, бы струна, Бязгучная гайдаецца калыска, Як паміж небам і зямлёй труна. ...І плакаў ён, Хаця ў праменьнях сініх Эдэмская купалася зямля, Бо лепш у самым чэраве загінуць, Чым падарыць нашчадкам гэткі шлях. Нашто жыве і ў дыме гіне вулей?! Нашто стагодзьдзі беспрасьветных мук?! ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ І Ева падышла і працягнула Далоні сонных і пяшчотных рук. І ён з трывогай, з радасьцю няпэўнай І з мужнасьцю суровай, як праклён, Прынік да іх у страсьці горкай, гнеўнай, Бо ён любіў... Бо добра помніў сон.
9.VIII.1962. Рагачоў.
|
|