Згубіцца ў восеньскім густым тумане, Нібы згарэць у восеньскім агні, Нібы разьбіцца на аэрапляне, Упаўшы зь неанёльскай вышыні, Хацела ты, прачнуўшыся далёка Ад горада, дзе вечна тлум і дым. А тут ля вокан лётае сарока І нас заве ў бярэзьнік залаты, Нібыта ў Храм, дзе нас даўно з табою, Шчасьлівых, як ніколі, не было. Згубіцца, каб застацца, быць з ракою, Дзе стронга, як застылае сьвятло. Згубіцца, і глядзець у цемру неба, І не баяцца, што жыцьцё міне І будзе нам нічога ўжо ня трэба, Як пылу, што прыгрэўся на вакне.
|
|