РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі           Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Зь песень а бітвах
Іграюць сурмы баявыя,
Віхор разносе іхні звон, –
I песьні дзіўныя такія
Ад іх лятуць да ўсіх старон.
 
Аб славе цуднай граюць сурмы,
Аб шчасьці люду усяго;
Завуць змагаць няволі штурмы,
Завуць... ой, многа да чаго!..
 
Дый дарма звоняць сурмы гулка,
Народ абманены прыціх, –
Той сьпіць, той ходзе без прытулка,
А жаль і роспач ува ўсіх.
 
Мучыцель толькі рад, снуецца,
Як шакал дзікі па трупах, –
З ахвяр сваіх ваўком сьмяецца,
З ахвяр, што мруць у ланцугах.
 
I відзець страшна ў путах сілу,
Людскі ўвесь з жалю енк і плач,
Аж хоць кладзіся у магілу
I сьвету гэтага ня бач.
 
I ходзіш так, як пагарэлы,
I хочаш людзям скаргі слаць,
Азвацца крыкам на сьвет цэлы:
Дзе праўды, волі дзе шукаць?!
 
А сурмы граюць баявыя,
Віхор разносе іхні звон, –
I песьні дзіўныя такія
Ад іх лятуць да ўсіх старон.
 
30.III.1906
 
 
 
 
Падабаецца     Не падабаецца
2009–2019. Беларусь, Менск.